Post-Yolanda rehab project sa Coron, dinadalaw ng mga beauty queen

LUNGSOD QUEZON, ika-21 ng Enero  --- Hindi man natuloy ang mga kandidata ng Ms. Universe sa Palawan, dadalaw naman ang kasalukuyang Ms. Universe na si Pia Wurtzbach sa nakabibighaning Coron.

2013 Ms. Universe Gabrielle Isler ng Venezuela (gitna). Larawan galing sa CordAid

Pupuntahan ni Pia ngayong Sabado ang Integrated Watershed Management for Climate Resilience in Coastal Communities Project sa Barangay Malawig na isa sa mga lugar na naapektuhan ng Bagyong Yolanda.

Sa Noong 2014, dumalaw at nakiramay din ang 2013 Miss Universe na si Gabrielle Isler sa Coron sa imbitasyon ng CordAid (Catholic Organization for Relief and Development Aid). Malalim ang partisipasyon sa nasabing proyekto ang isang kumunidad ng katutubong Tagbanwa na karamihan ay mga kababaihan.

Sa pagdalaw nina Pia at Gabrielle, nababatid ng mga kababayan sa ibang panig ng bansa at maging sa buong mundo ang sinapit at kalagayan ng mga nakaligtas sa Bagyong Yolanda.

Ayon kay Fr. Edwin Gariguez, ang Executive Secretary ng National Secretariat for Social Action (NASSA)/Caritas Philippines, katanggap-tanggap sa Simbahang Katolika ang proyekto dahil nilalayon nitong bigyan kaalaman, kasanayan at kumpiyansa ang mga kababaihan at mga kababayang katutubo.

Pinangangasiwaan ng CordAid ang proyekto kabalikat ang Simbahan Katolika sa pamamagitan ng NASSA/Caritas Philippines at ang Apostolic Vicariate of Taytay-Social Action Center (AVT-SAC).Sumusuporta rin ang pamahalaang bayan ng Coron at ng Miss Universe Foundation.

Dahil sa proyekto, nahahasa ang kakayahan ng mga kababaihan para malagpasan ang mga bantang panganib mula sa kalikasan, nagbabagong klima at kalamidad.

Isang sa mga benepisyaryo ng proyekto na ininspeksyon ang kanyang gulayan sa Coron

Ito ay sa pamamagitan ng paggamit ng mga paraan ng pangangasiwa sa lupa at katubigan na angkop at katanggap-tanggap sa kulturang katutubo.Bukod, nagkakaroon ng pagkakataon ang mga benepisyaryong katutubo na matutunan ang mga gawain tulad ng paggugulay at paggawa ng handicrafts para mayroon silang kabuhayan.

Ang CordAid ang isa sa mga samahan tumulong sa mga kababayang pininsala ng Bagyong Yolanda. (LP/NASSA/Caritas Philippines)