Sumasagot sa mga tanong ng media si Regional Director Eduardo Janairo ng DOH-Mimaropa hinggil sa MERS-CoV sa isang panayam sa kanyang tanggapan kamakailan
QUEZON CITY, Ika-17 ng Pebrero (PIA) --- ‘Wag maniwala sa
tsismis ha.
Ang panawagan ng Department of Health –Mimaropa sa mga
kababayan hingil sa Middle Eastern Respiratory Syndrome Coronavirus (MERS-CoV),
suriing mabuti ang nasasagap na balita.
“Wag magpapanik, wag iisiping magiging malala ang
sitwasyon, wag rin makikinig sa tsismis. Marami kasing lumalabas na impormasyon
tungkol sa MERS-CoV di-umano sa Mimaropa, hindi naman tutuo, “sabi ni
DOH-Mimaropa Regional Director Eduardo Janairo sa isang panayam sa mga
taga-media.
Inamin ni Director Janairo na dalawa sa mga kapwa-pasahero ng kababayang pumusitibo sa
MERS-CoV ay nakauwi na sa Oriental Mindoro batay sa kanilang ginawang contact
tracing.
Pero nilinaw ng direktor na ang dalawang pasahero ay
negatibo sa MERS-CoV matapos dumaan sa pagsusuri at obserbasyon.
Walang ring katibayan na mayroong dalawa pang pasahero ng
Saudia Airlines Flight 860, mga di-umano’y nakasabay din ng nars na positibo sa
MERS-CoV, ang pumasyal sa alinmang
resort sa Palawan.
Nauunawaan ni Director Janairo kung bakit ganun na lang ang pangamba
ng mga kababayan sa MERS-CoV: ang mga senyales nito ay katulad sa taong may trangkaso
o lagnat, may ubo at sipon.
Pero may limitasyon ang panghahawa ng MERS-CoV.
Ani Director Janairo, kung walang sintomas ang tao sa ika-15
o kaya ika-19 na araw mula sa araw nang kanyang di-umano’y pagkakahawa, maituturing
na siyang negatibo o walang sakit.
Tiniyak ni Director Janairo na nakahanda ang DOH at ang mga
pasilidad nito na pangasiwaan ang pangagamot sa MERS-CoV.
Sa ngayon, ang kababayang nars na ginagamot sa Research
Institute for Tropical Medicine (RITM) ang kaisa-isang kumpirmadong kaso ng
MERS-CoV sa bansa.
Walang puknat pa rin ang apila ng DOH sa lahat ng mga
kababayan at biyaherong umuwi
kamakailan mula sa Middle East: makipag-ugnayan sa kagawaran kapag nilalagnat, inuubo
at kinakapos ang paghinga.
Ang mga numero ng DOH – Mimaropa ay 02-913-4650, 02-912-7754
at 02-912-0192 local 130; matatawagan naman ang DOH-Central Office sa 02-7111-001 at 02-7111-002.
