Target ng Comelec: maraming maitala sa huling Biometrics Registration

QUEZON CITY, Ika-30 ng Oktubre  --- Bagamat gipit na sa panahon, susubukin pa rin ng Commission on Elections (Comelec) - Region IV na maipatala ang natitirang mahigit sa kalahating milyong botanteng wala na pang biometrics registration ngayong katapusan.

Batay sa record ng Comelec Region IV noong October 25, ang wala pang biometric registration sa  Calabarzon at Mimaropa ay 547,141 pa.

Sa panayam kay Atty. Juanito Ocampo Icaro, ang Regional Election Director ng Comelec-Region IV, “may mga parameter naman silang ipinatutupad para mairehistro ang lahat ng mga qualified voters.”

Yung nga lang kailangan agahan ng mga botante ang pagpunta sa tanggapan ng Comelec.

“Ang isang machine (voters registration machine o VRM) ay mga 200-250 lang ang kanyang i-accommodate…para hindi mag-antay maghapon, iniisyuhan naming ng number agad…first come, first served basis po yun…hanggang October 31 gagawan natin ng paraan para makapagparehistro ng maramihan,” sabi ni Director Icaro.

Bukod pa rito, nakapagdagdag pa anya ang Komisyon ng mga VRM.

Pero kung hindi mairerehistro sa isang voters registration machine ang biometrics ---lagda, larawan, iris ng mga mata, mga marka ng mga daliri---ng isang botante ngayong Sabado,  sinabi ni Director Icaro na hindi ito makakaboto sa halalan sa  Mayo 2016  alinsunod sa itinatakda ng Republic Act No. 10367 o “An Act Providing for Mandatory Biometrics Voters Registration.”

Kahit pa dati nang nakarehistro ang botante pero nabigo siyang maipatala ang kanya biometrics, antimanong pawawalang-bisa  ng Comelec ang kanyang registration.

Isinisisi ni Director Icaro sa “mamaya na habit” ng ibang mga kababayan ang pagdagsa ng mga botante sa mga huling araw ng Biometrics Registration.

Ang mga nagpatala sa Comelec  general registration mula 1997 hanggang 2002 pati ang mga baguhang botante at mga nangangailangan ng pagwawasto sa kanilang rehistrasyon ang target ng RA No. 10367.

Mayroong satellite registration ang Comelec Region IV sa Robinson’s Place sa Puerto Princesa City samantalang ang karamihan ng pagpapatala ay sa mga field office ng Comelec sa iba’t ibang lalawigan ng Mimaropa. 

Para sa karagdagang impormasyon, pakinggan ang mga paliwanag pa ni Director Icaro sa mga sumusunod na link: 

Huling Hirit sa Biometrics Registration
https://www.youtube.com/watch?v=Q4mu0m-anQc

NoBioNoBoto
https://www.youtube.com/watch?v=fdb0ylPaWVY

Batayan ng NoBioNoBoto
https://www.youtube.com/watch?v=AYHKKPPMEx4