Pagasa-DOST sa mga taga-Palawan: iwas-dagat muna habang papalayo si Queenie

                      Ang larawan na ito ay mula sa Pagasa-DOST

QUEZON CITY, Nobyembre 28 (PIA)---Papalayo na ang Bagyong Queenie pero pinapayuhan pa rin ng Pagasa-DOST ang mga kababayan sa kanluran baybayin ng Palawan na huwag munang pumalaot .
Dahil dito, inalis na ang babala ng bagyo na pinairal sa Palawan.

Habang dumadaan ang bagyo nitong Huwebes, dalawang katao ang nailigtas ng mga tauhan ng Bantay Dumaran at Pulisya sa karagatang bahagi ng Dumaran.

Pinataob ng malalakas na hangin at malalaking alon ang bangkang sinakyan nina Ronilo Bacay at Jayson Tayo kahapon.

Ang dalawa ay naihatid na sa barangay Poblacion.

Mahigit sa limangpung katao kabilang ang may dalawamput-dalawang elementary student ang sinundo ng 117 Rescue Team at ng Kilos Agad Action Center  matapos ma-istranded sa Sitio Magarwak, Barangay Bacungan sa Puerto Princesa City.

Sa ulat ng City Disaster Risk Reduction and Management Office-Puerto Princesa City,  nagsasagawa ng field trip ang mga biktima sa lugar nang abutan ng malakas na ulan.

Umabot sa 343 na mga kabahayan ang napinsala ng Bagyong Queenie; lima sa nasabing bilang ay ganap na nasira at matatagpuan sa bayan ng Linapacan.

Ang pang-anim na ganap na nawasak na bahay ay nasa bayan ng Roxas.

Ang karamihan ng mga bahagyang napinsalang bahay ( umabot sa 287) ay matatapuan sa bayan ng Araceli.

Labing dalawang bangka sa bayan ng Linapacan ang naiulat na nasira.

Hanggang baywang naman ang baha sa mga barangay ng Talog, Cataban at Poblacion sa bayan ng Taytay.

Pero sa ulat ng Office of Civil Defence - Mimaropa, bumababa na ang baha sa mga nabanggit na barangay. (LP)

Ilang mga residente sa mga baybaying barangay sa Palawan, pinalikas bago bumagyo

Ang larawan ay mula sa PAGASA-DOST

QUEZON CITY, Nobyembre 28, (PIA) - Maaang pinalikas ng mga awtoridad ang mga residenteng ng ilang coastal barangay sa Palawan para makaiwas agad sa disgrasya sa Bagyong Queenie.

Sa ulat ng Office of Civil Defense - Mimaropa (Sitrep No. 6)- umabot sa 2, 137 katao ang nailipat sa evacuation center.

Karamihan ng mga evacuees ay mula sa mga bayan ng Culion (mga barangay ng Osmena at Jardin), Taytay (mga barangay ng Poblacion, Biton at Pamantolon), Araceli at Linapacan (mga barangay ng Calibangbangan at San Miguel).

Ang mga  bulto ng evacuees ay mula sa Barangay Poblacion ng Taytay, sumunod ang Barangay Calibangbangan ng Linapacan at panghuli ay ang bayan ng Araceli.

May ilang mga evacuees sa Araceli, mga 140 katao, tumutuloy ngayon sa kanilang mga kamag-anak sa halip na sa evacuation centers.

Ang maagang paglilikas ay karaniwang hakbang na ginagawa ng mga lokal na pamahalaan gaya ng Albay para maiwasan mapinsala ang mga mamamayan sa bagyo. (LP)