Pamahalaan ng Pilipinas, dibdiban ang pagpapalago ng mga negosyo

Hinikayat ng pamahalaan ang mga mamamayan na magnegosyo sa halip na mamasukan.

Kung mapapalago ang mga negosyong bulilit, lalaki din ang mga oportunidad sa trabaho sa bansa.

“Maraming tayong programa dyan, isa na rito ang SME (Small and Medium Enterprises)Caravan…iniikot natin sa bansa yan at nagbibigay tayo ng libreng seminar,”ayon kay ni Trade and Industry Secretary Gregory Domingo, “tinuturuan natin kung paano magnegosyo, kung ano ang inenegosyo at mayroon pang technical skills training.

Kaya sa pagbubukas ng SME Week, panawagan ni Secretary Domingo sa madla ay lumahok sa mga libreng enterpreneurship briefing sessions sa iba’t-ibang panig ng bansa.

Sa mga taga-Mega Manila, maaring magsadya sa Philippine Trade Training Center sa Biernes at sa Sabado para sa maghapong pakikiniig at panonood ng mga talakayan.

Ang skedyul sa biernes mula alas-8 ng umaga hanggang alas-12 ng tanghali: (1) paano mag-negosyo; (2) ang pagpapaliwanag sa Barangay Micro Business Enterprises (BMBE) Law; (3) Product Standards Law (o mga pamantayan sa produkto); (4) karapatan at proteksyon sa mamimili; (5) paano makakakuha ng Food and Drug Authority Certificate; (6) Paano magagamit ang internet sa pagnenegosyo; (7) paano magtatayo ng laundry business o pagnenegosyo sa pamamagitan ng paglalaba;(8) paggawa ng pabango; (9) paggawa ng herbal soap; (10) meat processing o paggawa ng tosino, longganisa at luncheon meat; at (11) paggawa ng mga kwintas at iba pang accessories gamit ang beads.

Pagdating ng hapon, ang mga sumusunod naman ang mga pag-uusapan mula ala-una hanggang alas-5 ng hapon : (1) integrated business licensing;(2) seminar sa Halal certification o pagsesertipika ng mga produktong Halal; (3) cleaner production; (4) packaging design at labeling; (5) product design awareness;(6) pagrerehistro ng patents, trademarks and trade names; (7) laundry and cleaning aids; (8) paggawa ng siomai at iba pang meat processing products; at (9) gift-wrapping.

Bukod sa mga nabanggit na paksa, tatalakayin din buong maghapon ang paghilot at kung ano ang mga hakbang para makinabang nang husto sa paghihilot.

Sabado, ika-9 ng Hulyo, ang maghapong pag-uusapan sa briefing session ay ang basic photography at flips-flops (sandals) making.

Naka-iskedyul din sa umaga mula alas-8 hanggang alas-12 ng tanghali, ang mga sumusunod: (1) pagpapatakbo ng money-changing shop; (2) mga programa sa pag-pagpopondo at pagpapautang para sa negosyo; (3) paano magsimula ng negosyo; (4) food safety o pagtiyak ng kalinisan sa pagkain at kaligtasan ng mamimili; (5) paggawa ng siopao at dimsum; (6) paggawa ng mga cakes na hindi na kailangan lutuin (No-Bake); at (7) paggawa ng polvoron at pastillas.

Sa hapon, pag-uusapan naman ay ang mga sumusunod: (1) pagbili ng prankisa (o negosyong pinaprankisa gaya ng mga fastfood); (2) pagpapa-upa ng apartment o puwesto; (3) paggawa ng pabango; (4) paggawa ng mga produktong gamit ang bead; (5) mga cleaning aid; (pag-aayos o arrangement ng bulaklak at lobo); at (6) paggawa ng empanada at pizza roll.

Maaring magbago ang skedyul, kaya pinapayuhan ang lahat ng mga interesadong matuto sa briefing session na tumawag sa DTI-Bureau of Micro, Small & Medium Enterprise Development (DTI-BMSMED) sa numerong 897-1693 at 751-5076.

Bago ang mga briefing session, magkakaroon muna ng SME Summit sa Huwebes kung saan ang ‘mga small and medium enterprises ay magpupulong-pulong para makagawa ng plano at makita kung saan pa ang mga kinakailangan’.

kabilang sa pag-uusapan sa SME Summit ay ang SME Development Plan mula taong 2011 hanggang 2016.

Hinggil naman sa One Town, One Product (OTOP) program, tiniyak ni Secretary Domingo na palaban ang mga pangunahing produkto ng bawat lalawigan.

Inihalimbawa ng kalihim ang banig.

Marami ngang gumagawa ng banig, pero sabi ni Secretary Domingo na malilito ang mga mamimili sa dami ng disensyong pagpipilian.

Anang kalihim, maraming banig ang pwedeng isabit sa dingding tulad ng painting.

Ang konsepto ng OTOP ay kamukha ng programang ipinatupad sa Thailand kung saan nangapital ang pamahalaan para palawakin ang mga negosyo sa iba’t ibang rehiyon ng monarkiyang bansa.

Para sa karagdagan impormasyon sa pagnenegosyo, panoorin ang talakayan nina Secretary Domingo at Albay Governor Joey Salceda sa "Pilipinas Natin" (Pindutin ang kuneksyong ito: http://bit.ly/q5T5Pl ).

Reference:
Lyndon Plantilla, 09212745592
Philippine Information Agency
opspia2004@yahoo.com

May problema sa PhilHealth? Sumugod sa PhilHealth Sabado 2

Kung ikaw ay sundalo at retirado sa edad singkwenta'y sais, makikinabang ka ba sa PhilHealth?

Pwede, sabi Philippine Health Insurance Corporation President at Chief Executive Officer Rey Aquino kaninang umaga sa pang-Martes na edisyon ng PIA Communication and News Exchange Forum/Talking Points.

Basta't nakapaghulog o may isang daan at dalawampung kontribusyon na sa PhilHealth ay walang dapat ikabahala ang sundalong retirado, dagdag paliwanag ni Dr. Aquino.

Mas maaga ng siyam na taon ang pagreretiro ng mga nasa military service kumpara sa karaniwang manggagawa sa pamahalaan at sa puntong ito nagkakaroon ng kalituhan minsan sa sandaling maghabol ng benipisyo ang mga retiradong kawal.

Kung may mga miyembrong namumublema sa paggamit ng PhilHealth, pinapayuhan sila ni Dr. Aquino na lumahok sa PhilHealth Sabado 2 ngayong June 25 sa ilang mga piling paaralan.

Noong isang taon unang idinaos ang PhilHealth Sabado na naglalayong sakupin maging ang mga mamamayan sa informal sector na may kakayahang makapaglaan ng pondo para sa pangangailaga ng kalusugan.

Kabilang sa mga ito ay ang mga mangingisda, drayber ng dyip, tindera't tindero sa palengke o mga self-employed individuals pati mga propesyunal gaya ng doktor at abugado na may private practice o hindi namamasukan.

Bakit pati doktor at abugado? Naniniwala si Dr. Aquino na darating ang panahon na mangangailangan din ang mga propesyunal ng tulong mula sa PhilHealth.

Sa huling bilang ng PhilHealth, mahigit sa apat na milyong informal sector workers ang nakarehistro sa ngayon.

Kung pagbabatayan ang census ng National Statistics Office noong 2008, mahigit sa sampung milyong katao sa informal sector ang may kapasidad na magbayad ng health insurance.

Kaya ngayon, sinisikap ng PhilHealth na mairehistro ang natitirang anim na milyong katao sa sektor alinsunod na rin sa hangarin ng Pangulong Noynoy Aquino na magbigyan ng health insurance ang lahat.

Kasama sa hangarin na ito ang pagkakaroon ng PhilHealth ang mga sponsored members: mga miyembrong hindi magbabayad ni singkong duling matapos makapagpagamot sa ospital.

Nililinaw lang ng PhilHealth na hindi libre ang mga sponsored members; sila ang mga pinakamahihirap na mamamayan na sasagutin ng Pamahalaang Nasyunal o ng lokal na pamahalaan na ang kanilang kontribusyon sa PhilHealth.

Paalala lang ni Dr. Aquino sa mga pupunta sa PhilHealth Sabado: magdala ng birth certificate o marriage certificate at ng tatlong daan piso bilang paunang kontribusyon sa unang tatlong buwan.

Kada tatlong buwan ang hulugan sa PhilHealth, kaya sa isang taon, ang kabuuang kontribusyon ay aabot sa P1,200.

Kapag miyembro na ng PhilHealth, hindi lang yung taong naka-rehistro ang makikinabang kundi pati ang asawa, anak at iba pang idedeklarang dependent ng miyembro.

Para sa mga taga-Metro Manila, maaring magparehistro sa mga sumusunod na paaralan: (1) Aurora Quezon Elementary School, San Andres, Malate, Manila; (2) Commonwealth Elementary School, Commonwealth Avenue, Quezon City;(3)T. Paez Elementary School, Apelo Cruz Street, Malibay, Pasay City; (4) Pasig Elementary School, Caruncho Avenue, San Nicolas, Pasig City; (5) San Juan Elementary School, N. Domingo corner A. Luna Streets, Balongbato, San Juan City;(6) Gen. T. De Leon Elementary School, Gen. T. De Leon, Valenzuela City; (7) Navotas Sports Complex, Navotas, Manila; (8) Bayanan Elementary School Unit I, Valeda Street, Bayanan, Muntinlupa City; (9) National Kidney and Transplant Institute, East Avenue, Quezon City; and (10) SM Taytay Event Center.

Sa iba pang lungsod at lalawigan, tumawag sa PhilHealth sa telepone bilang 637-6262 o 637-9999.

Para sa karagdagan paliwanag sa PhilHealth Sabado 2 at iba pang isyung pang-PhilHealth, panoorin si Dr. Aquino sa mga sumusunod na links: http://bit.ly/moUsuH, http://bit.ly/iQB9qx at http://bit.ly/kFuAw6.

ITCZ, pinalubog sa baha ang ilang bayan sa ARMM at Mindanao

Nagdulot ng baha ang Intertropical Convergence Zone (ITCZ) matapos magpakawala ng napakaraming tubig sa ilang lalawigan sa Mindanao at sa Autonomous Region in Muslim Mindanao (ARMM).

Nabubuo ang ITCZ kapag nagsalubong ang Northern Hemisphere Trade Winds (hanging mula Hilagang-Silangan) at Southern Hemisphere (hanging mula Timog-Silangan) Trade Winds (tingnan ang http://bit.ly/lRBnd8).

Ang trade winds ay hango sa mga hanging (hanging umiihip mula silangang hanggan kanluran) ginagamit na puwersa sa paglalayag ng mga sinaunang marino (tingnan ang http://bit.ly/mMmzMq).

Sa rehiyon kung saan umiiral ang ITCZ, nagkakaroon ng maulap na papawirin, manaka-nakang pagkulot at pagkidlat, pag-ulan at pag-ihip ng hangin mula katamtaman hanggang malakas (tingnan table sa http://bit.ly/lRBnd8).

Bukod sa ARMM, apektado rin sa baha ang Region X, Region XI at Region XII kasunod nang walang humpay na pag-ulan sa pagitan ng huling linggo ng Mayo at unang linggo ng Hunyo.

Sa mga situationer report ng Department of Social Welfare and Development (DSWD) kaninang umaga, mahigit sa siyam na raan at anim na pung libong katao ang naapektuhan at mahigit sa walong libong pamilya ang pinalipat sa mga evacuation center.

Pitumput-isang bahay ang ganap na nawasak samantalang tatlong daan at tatlumput isang iba pa ang bahagyang napinsala.

Sa Region XII, nakabukas pa rin ang may 40 evacuation center kung naroroon ang halos walong libong pamilya.

Mahigit naman sa 55,000 na pamilya ang pansamantalang pumisan sa mga tahanan ng kanilang mga kamag-anak o kaibigan sa iba’t-ibang lugar.

Sa Pikit, North Cotabato, mahigit sa dalawang libo at dalawang daang bahay ang lubog sa baha at tatlumput anim naman sa Lambayong, Sultan Kudarat.

Sa Region XII, umabot halos ng pitong milyong piso ang halaga ng relief assistance na ipinagkaloob ng DSWD at ng mga lokal na pamahalaan.

Naglaan naman ang DSWD National Resource Operation Center (NROC) ng halos pitong daan libong pisong halaga ng mga t-shirt, pantalon, jacket, kumot, kobre-kama, comporter at iba pang non-food items para sa Region XII at maging sa ARMM.

Dalawang milyong pisong karagdagang pondo naman ang inilaan ng kagawaran para ipambili ng relief goods para sa mga binaha sa Maguindanao at sa Lanao del Sur.

Sa DSWD (nasyunal at lokal) pa lang, aabot na sa mahigit sa walong milyong piso na ang kabuuang halaga ng assistance na ipinagkaloob sa mga biktima ng baha.

Halos labing dalawang milyong piso ang halaga ng mga tulong na ipagkaloob ng pamahalaang lokal, pamahalaang nasyunal (kabilang na ang DSWD) at maging ng mga kabalikat na non-government organization.

Hinggil naman sa epekto ng pagdaan ng Bagyong Egay sa Kabikulan, iniulat ng DSWD na pinayagan kahapon ng mga awtoridad sa Albay, Catanduanes, Masbate at Sorsogon ang lahat ng mga biyahe sa karagatan.

Tanging ang may labing walong pasahero na lang papuntang San Pascual, Masbate na nananatiling stranded sa Pasacao Port sa Camarines Sur.

Namigay naman ang DSWD Region V ng limang daang family packs (na nagkakahalaga ng Php125,000) sa mga pasaherong nai-stranded sa Pilar, Sorsogon.

Wala naman naiulat na bahay o ari-ariang nasira.

Mahigit sa Php37-Million ang halaga ng standby funds na itinabi at relief goods na pinusisyon ng DSWD sa kanilang mga field office sa Region 1, Region 2, Region V at CAR bilang pangsuporta sa mga maapektuhan ng Bagyong Egay.

Egay, palabas na ng Pilipinas

Yayao na si Egay!

Sa pagtaya ng PAGASA, masusumpungan ang Bagyong Egay sa layong 370 kilometro Hilagang Kanluran ng Aparri at Cagayan mamayang hapon.

Mas mabilis ngayon si Egay kumpara kagabi: mula sa dating 19 kilometro bawat oras, ngayon ay 20 kilometro bawat oras pa-kanluran-hilagang-kanluran direksyon.

Hindi nagbago ang lakas ng kanyang hangin, 55 kilometro bawat oras malapit sa gitna.

Kahit papaalis na si Egay, nakataas pa rin ang public storm signal number 1 sa Hilagang Cagayan, sa mga isla ng Babuyan, Batanes at Calayan, Apayao at Ilocos Norte.

Gaya ng dati, pinapayuhan ng National Disaster Risk Reduction and Management Council (NDRRMC) ang mga residente sa mga nasabing lugar na mag-ingat lalo na yung mga nasa mabababa at bulubunduking lugar.

Kung palaging baha sa inyong lugar, panahon na sigurong pag-isipan ang paglipat ng tirahan sa mga mas matataas na lugar.

Sa mga nangisngisda at bumibiyahe sa kanlurang baybayin ng Luzon at Bisayas at maging sa silangan baybayin ng Luzon, kung maliliit ang inyong mga bangka, sa ibang araw na kayo pumalaot.

Sa taya ng PAGASA, magiging maulan at malalaki ang mga alon dun kaya kahit pati ang mga malalaking sasakyang pang-dagat ay pinapayuhang ng pag-ibayuhin ang pag-iingat.

Balitang-balita ang sinasabing papasok na bagong low pressure area na maaring maging malakas na bagyo.

Sa halip na mag-alala, maghanda: mag-imbak ng sapat na pagkain, baterya sa ilaw at radyo at pagtibayin ang bahay kung may panahon pa.

Para sa pinakahuling balita sa bagyo, silipin ang weather.gov.ph ng PAGASA, ang ndrrmc.gov.ph ng NDRRMC at pati ang Weather Watch account ng Philippine Information Agency sa Facebook.

Egay bumibilis, papalabas ng bansa

Bumilis ang Bagyong Egay papuntang dulong Hilagang Cagayan sa direksyon ng Batanes at Calayan.

Huling namataan sa layong 140 kilometro Silangan ng Aparri Cagayan kaninang alas kuwatro ng hapon, kumikilos si Egay sa bilis na 19 kilometro bawat oras mula sa dating 17 kilometro bawat oras.

Hindi nagbabago ang lakas ng hangin ni Egay, 55 kilometro bawat oras malapit sa gitna.

Kung magtutuloy-tuloy ang pagkilos ni Egay, sinabi ng PAGASA na posibleng hindi na ito lumagpak sa lupa o mag-landfall at diretsong lumabas ng bansa.

Gayumpaman, nagpayo pa rin ang National Disaster Risk Reduction and Management Council (NDRRMC) sa mga naninirahan sa mababa at bulubunduking lugar sa Isabela, Cagayan, Calayan Islands, Batanes Islands, Apayao at Ilocos Norte na mag-ingat sa baha at sa pagtabag o pagguho ng lupa.

Nakataas pa rin sa mga nasabing lugar ang babala ng bagyo bilang isa.

Dahil sa paghatak ni Egay, malakas pa rin ang Hanging Habagat na siyang magpapaulan sa nalalabing bahagi ng Luzon at Kabisayaan.

Sa Mindanao, ang Inter-tropical convergence zone ang maghahatid ng ulan.

Dagdagan po ang ingat lalo na sa mga binabahang lugar gaya ng Cotabato City.

Pinapayuhan ng PAGASA ang mga mangingisda at mga nagmamay-ari ng mga bangka at maliliit na sasakyang pandagat sa kanlurang baybayin ng Luzon at Bisayas at maging sa silangan baybayin ng Timog - Luzon na ipagpaliban ang pagpalaot dahil sa inaasahang malalakas na alon .

Bukas ng umaga, inaasahan ng PAGASA na nasa layong 200 kilometro kanluran ng Basco, Batanes ang Bagyong Egay.

Antabayan mamaya sa radyo, TV at maging sa WEATHER WATCH ng Philippine Information Agency sa Facebook para sa mga balita sa bagyo.

Alas-onse ng gabi ang susunod na update ng PAGASA: maaring makita sa website nilang weather.gov.ph at maging sa website ng NDRRMC (ndrrmc.gov.ph o ndcc.gov.ph).

Mga ayaw mag-waste segregation, pagmumultahin ng pamahalaan

May mga ginagawang hakbang ang pamahalaan para mapwersa ang bawat tahanan na matutunan ang waste segregation.

Sa pang-Biernes na edisyon ng PIA Communication and News Exchange Forum, tiniyak ni Environment and Natural Resources Secretary Ramon Paje na seryoso ang pamahalaan sa pagpapatupad ng Solid Waste Management Act.

Anya, nagsisimula sa bahay ang waste segregation o paghihiwalay ng mga nabubulok sa hindi nabubulok na basura.

“Dapat i-manage ang basura, hindi ni Mayor, Hindi ni Vice Mayor o ni Kapitan,”sabi ni Secretary Paje, “bago pa lang ilabas ng bahay, dapat segregated (hiwa-hiwalay) na.”

Kung tutuusin, paliwanag ni Secretary Paje, sa waste segregation pa lang ay mababawasan na ang basura.

Yung mga nabubulok na basura ay pwedeng tipunin para gawing pataba; yung mga hindi na bubulok ngunit pwede pang gamitin tulad ng bote, garapa at dyaryo ay pwedeng pagkakitaan.

Sa kabila nito, aminado ang kalihim na mahirap pasunurin ang mga tahanan sa waste segregation na ipinag-uutos ng batas.

Ito ang dahilan kaya nakipag-kasundo ang Department of Environment and Natural Resources sa mga lokal na pamahalaan lalo na sa Metro Manila para umaksyon at pumilit sa mga mamamayan na mag-waste segregation.

Ayon kay Secretary Paje, lahat ng mga kontratista sa pagkuha ng basura ay pagmumultahin ng kalahating milyong piso sa sandaling matuklasan na tumatanggap ang mga ito ng magkakahalong basura.

Dahil sa napakabigat na multa, naniniwala ang kalihim magiging maselan ang mga kulektor sa mga basurang manggagaling sa mga kabahayan.

Kung mayroong pa ring magmamatigas at ayaw mag-segregate ng basura, sinabi ni Secretary Paje na mangangamoy ang mga bahay ng mga ganitong pasaway.

Para sa karagdagang paliwanag ni Secretary Paje, panoorin siya sa http://bit.ly/lGBtAT  at http://bit.ly/j4MXQU.