OCD-Mimaropa: lindol dapat paghandaan ng lahat

LUNGSOD QUEZON¸ Nobyembre 13 (PIA)---Muling makikipagsabayan ang Mimaropa sa iba pang rehiyon na lalahok sa 4^th Quarter Nationwide Simultaneous Earthquake Drill.

Para sa Mimaropa¸ ang pilot area o pagdarausan ng kick-off rites ng Earthquake Drill ay ang Capitol Compound ng Palawan sa Lungsod Puerto Princesa.

Ayon kay Neri Amparo¸ Senior Civi Defense Officer ng Office of Civil Defense – Mimaropa¸

nilalayon ng earthquake drill ay makasanayan ng mga kababayan ang mga hakbang na dapat gawin kapag lumindol at iba pang kaakibat na pangyayari gaya ng pagbagsak ng mga gusali o kaya ay sunog.

Kabilang na rito ang pagtukoy ng sisilungan kapag lumindol kung saan pwedeng yumuko (duck)¸ magtakip (cover) at panatilihin ang posisyon (hold) habang hindi pa natatapos ang pagyanig.

Bago sumapit ang pagsasanay¸ pinag-uusapan ng mga kalahok ang mga bahagi ng kanilang lugar na maaring maging magdulot ng pinsala at ang mga lusutang ligtas daanan patungo sa lugar na paglilikasan.

Sa paaralan man o sa mga tanggapan ng pamahalaan¸ bawat isang kalahok ay may papel na gaganapan.

Para kay Amparo¸ ang paghahanda sa sakuna ay responsibilidad ng lahat: bawat pamilya ay dapat maghanda.

Dapat din anyang may bagong evacuation kits at medical kits ang mga kababayan para may magagamit sa sandaling lumindol.

Sa gaganapin na earthquake drill sa Kapitolyo¸ ang pagbabatayan ng pagsasanay ay ang lindol na may lakas na magnitude 7.

Magkakaroon ng eksena ng pagguho ng istraktura¸ sunog at pagkakaipit ng may dalawampung katao sa tatlong gusali ng Kapitolyo.

Sa earthquake drill din masusubukan ang bilis na pagresponde ng mga rescue unit ng Palawan Provincial Disaster Risk Reduction and Management Office at ng Puerto Princesa City Disaster Risk Reduction and Management Office na magsasanib- puwersa sa pagsasanay.

Umaasa si Amparo na dadalasan din ng mga establisimento at paaralan sa Mimaropa ang pagdaraos ng pagsasanay sa lindol may sabayang earthquake drill man o wala. (Lyndon Plantilla)