Lunes, Disyembre 18, 2017

DOST-Pagasa: kahit malayo na si Urduya, iwasan muna ang kanlurang baybayin ng Palawan


Ipinapakita ni DOST-Pagasa Weather Specialist Chris Perez ang kanlurang baybayin ng Palawan na napakaalon pa rin kahit pa nakalabas na ng PAR ang bagyong Urduja. (DOST-Pagasa)


LUNSOD QUEZON, Ika-19 ng Disyembre  (PIA) --- Nakalabas na ang Bagyong Urduja sa Philippine Area of Responsibility (PAR).

Kaninang ika-10 ng umaga, namataan ng DOST-Pagasa ang mata ng bagyo batay sa lahat ng kanilang datos sa layong 430 kilometro kanluran ng Puerto Princesa City.

Nagtataglay pa rin ang Bagyong Urduja na lakas ng hangin na 45 kilometro kada oras malapit sa gitna at pagbugso nang hanggang 60 kilometro bawat oras.

Pakanluran ang direksyong tinatahak ngayon ng Bagyong Urduja sa bilis na 18 kilometro bawat oras.


Gayumpaman, nagbabala ang  DOST-Pagasa na mapanganib pumalaot sa kanlurang baybayin ng Palawan dahil pa rin sa pagdaloy ng Hanging Amihan na siyang nagpapaalon sa lugar.

"Inaasahang paring magiging maalon hanggang sa napakaalon nitong western seaboard ng Palawan,"ayon kay Chris Perez, senior weather specialist ng DOST-Pagasa.

Ang tinatayang taas ng alon sa kanlurang baybayin ng Palawan ay maaring umabot sa halos apat at kalahating metro. #




Martes, Disyembre 12, 2017

DOST-Pagasa, binabantayan ang pagkilos ng bagyong Urduja

Makikita sa larawan mula sa video ng DOST Pagasa si Senior Weather Specialist Chris Perez habang ipinapaliwanag ang mga lugar na posibleng daanan ng Bagyong Urduja

Tinataya ng DOST-Pagasa na tatama sa lupa ang Tropical Depression Urduja sa dako ng Kabikulan at ng Silangan Kabisayaan ngayong Sabado.

Kahit nasa dako pa ng Dagat Pasipiko, maagang nagpasabi ang weather bureau sa mga  local disaster risk reduction and management office ng mga lokal na pamahalaan sa mga nasabing lugar na maghanda at gawin ang mga  kaukulang hakbangin.

Ayon pa kay Senior Weather Specialist Chris Perez, maaring  din tawirin ni Urduja ang ilang bahagi ng Katimugang Luzon batay sa kanilang forecasted track.

Kaninang ika- 3 ng umaga,  tinataya  ng DOST Pagasa ang bagyong Urduja batay sa lahat ng nakalap nilang datos sa layong 455 kilometro silangan ng  Surigao City, Surigao del Norte o  750 kilometro silangan timog silangan ng  Legazpi city, Albay.

Taglay ni Urduja ang malakas na hangin na hanggang 55 kilometro bawat oras at pagbugso na hanggang 65 kilometro bawat oras.

Tinatayang kikilos si Urduya pa-hilaga-hilagang kanlurang direksyon sa bilis na 7 kilometro bawat oras

Wala pang babala ng bagyo ngunit sinabi ni Perez na maaring magkaroon mamaya o sa mga susunod na araw.

Samantala, sinabi ni Perez na may epekto pa rin ang Hanging Amihan sa Hilaga't Gitnang Luzon at ang Tail end of a cold front naman sa dako ng kabikulan at Quezon Province.

Pinapayuhan din ni Perez ang mga mangingisda at mga gumagamit ng maliliit na bangka o sasakyang pandagat na umiwas mula sa mga baybaying nakapaligid sa Hilagang Luzon, ang silangang baybayin ng Gitna at Katimugang Luzon pati na rin sa silangan baybayin ng Kabisayaan kung saan pinaiiral ang gale warning.

Inaasahang maalon hanggang sa napakaalon ang karagatan sa mga nasabing lugar na may taas na maaring umabot sa halos tatlo hanggang apat na metro. #

Miyerkules, ika-13 ng Disyembre 2017

Martes, Nobyembre 28, 2017

Palawan hosts Mimaropa JJWC's Children's Congress today

The Mimaropa Regional Juvenile Justice Committee and Provincial Social Welfare and Development Office will hold today a Children’s Congress at the VGR Hall Provincial Capitol in Puerto Princesa City, Palawan in observance of the 6th Juvenile Justice Welfare Act Awareness Week . The congress aims to discuss  HIV and AIDS, mental health, drug and alcohol dependency and other issues affecting children.  

Below is the schedule of activities.

29 November 2017


Bilang pakikiisa sa ika-6 na Juvenile Justice Welfare Act Awareness Week, magdaraos ang Mimaropa Regional Juvenile Justice Committee ng Chlidren’s  Congress sa VGR Hall, Palawan Provincial Capitol sa Puerto Princesa City ngayong maghapon. Ang Children’s Congress, sa pakikipagtulungan sa Provincial Social Welfare and Development Act of Palawan, ay isang pagkakataon para mapag-usapan ang mga isyu ng HIV at AIDS, drug dependency, mental health, pagsali sa mga kilusang rebelde at iba pang paksa na may kinalaman sa mga bata. #

Makikita sa ibaba ang schedule of activities.

Ika-29 ng Nobyembre 2017



Biyernes, Nobyembre 24, 2017

DILG-Mimaropa: bilang ng mga nakapasa sa SGLG ngayong 2017, dumami

Dumami ngayong 2017 ang bilang ng mga nakapasa sa Seal of Good Local Governance o SGLG sa Mimaropa. 

Ayon kay DILG Assist. Regional Director Karl Caesar Rimando,  14 na lokal na pamahalaan ang nakapasa noong nakaraang taon at ngayon ay umabot na sa 20. 

Ang mga 2017 SGLG passer na pinararangalan sa mga oras na ito sa Maynila  ay ang Oriental Mindoro; ang mga lungsod ng Puerto Prinsesa at Calapan;  Gloria, Naujan, Pinamalayan, San Teodoro at Socorro sa Oriental Mindoro;  Abra de Ilog, Calintaan, Lubang, Sablayan at San Jose sa Occidental Mindoro; Magdiwang, Odiongan, Romblon at San Andres ng Romblon; Brooke's Point, Narra at Sofronio Espanola ng Palawan.

Ang Brooke's Point ay mayroong Special Distinction dahil sa pagkakapasa sa tatlong magkakasunod na taon sa SGLG.

Bawat isang nakapasang lokal na pamahalaan, nagpakita ng prinsipiyo ng katapatan, kahusayan at integridad sa kanilang paninilbihan sa mga kababayan, ay tatanggap ng ayuda mula sa Performance Challenge Fund para sa kanilang mga development project.

Ang ayuda ay nagkakahalaga sa pagitan ng 2 - 3 milyong piso.#

24 Nobyembre 2017

20 lokal na pamahalaan sa Mimaropa, pasado sa 2017 Seal of Good Local Governance

Pinarangalan ngayon hapon ang 448 na lokal na pamahalaan na nakapasa sa 2017 Seal of Good Local Governance o SGLG sa Maynila.

Dalawampu sa nakapasa ay nagmula sa Mimaropa sa pangunguna ng Brooke's Point, Palawan  na tatlong taon nang nakakapasa sa SGLG.  

Ayon kay DILG Assist.Regional Director  Karl Caesar Rimando, ang SGLG ay pagkilala sa katapatan at kahusayan ng pamahalaang lokal sa pangangasiwa ng pananalapi, paghahanda sa sakuna, palakasin ang social protection para sa marginalized sector, pagpapasigla ng negosyo at pagpaparami ng trabaho, pananatili ng peace and order sa kumunidad  at pangagalaga sa kalikasan.#  

24 November 2017

Biyernes, Nobyembre 17, 2017

Pre-emptive evacuation, laking tulong sa mga kababayang binabaha

Umabot sa 230 ang bilang ng mga taong inilikas sa Palawan dahil sa Bagyong Tino.

Halos kalahati ng nasabing bilang ay bunga ng pre-emptive evacuation na ipinanawagan kahapon ni  Office of Civil Defense – Mimaropa Regional Director Eugene Cabrera sa mga lokal na pamahalaan na may mga lugar na bahain at posibleng pangyarihan ng landslide.

Ang mga pinagdausan ng pre-emptive evacuation ay sa mga barangay Libertad at Silanga sa bayan ng Taytay at sa Caramay,  bayan ng Roxas.

Samantala, nagkaroon ng isang metro baha sa mga barangay ng Alimanguan, Sto. Nino and Binga sa bayan ng San Vicente.

Limang pung katao mula sa Barangay Alimanguan ang inilkas sa bahay ng kanilang barangay captain samantalang 75 katao mula sa Purok Tres ng nasabing barangay ang lumikas naman sa kani-kanilang mga kamag-anak na mataas ang kinalalagyan ang mga tirahan.

Sa kabilang dako, nasuspinde rin ang klase sa lahat ng level sa Culion samantala ang mga nasa pre-school lamang ang nasuspinde ang klase sa Puerto Princesa City dahil pa rin sa Bagyong Tino.

Isang bahay sa Puerto Princesa City ang ganap na nasira samantala sa dalawang bahay bahagyang napinsala sa bayan ng San Vicente.

Samantala, sa Mansalay, Oriental Mindoro, 99 na katao mula sa Barangay Poblacion ang lumikas sa kanilang barangay hall matapos bumaha sa kanilang lugar.

Napag-alaman na napakalakas ng pag-ulan sa Mansalay kahapon.

Bukod sa Barangay Poblacion, bumaha rin sa mga barangay ng Del Mundo, Teresita, Don Pedro at Manaul

Samantala, magdamag  nagbantay ang mga miyembro ng Regional Disaster Risk Reduction and Management Council ng Mimaropa ang pagdaan ng Bagyong Tino. 

Nagtulungan mga tanggapan ng Office of Civil Defense-Mimaropa sa mga kagawaran ng Interyor at Lokal na Pamahalaan, Science and Technology at Philippine Information Agency kabilang din ang Palawan Provincial Disaster Risk Reduction and Management Office, City Disaster Risk Reduction and Management Office ng Puerto Princesa City at Roxas D-R-R-M-O sa pagpapakalat ng impormasyon hinggil sa pagdaanan ng Bagyong Tino at mga nauukol na hakbang na dapat gawin.

Nakaantanbay naman ang mga resource at asset ng Department of Public Works and Highways, Police Regional Office – Mimaropa, Bureau of Fire Protection, Department of Social Welfare and Development Office, Department of Health, Coast Guard District Southern Tagalog at Coast Guard District Palawan kung sakaling kakailanganin

Publiko, pinag-iingat pa rin ng DOST-Pagasa sa pagpalaot sa kanlurang baybayin


Papalayo na ang Bagyong Tino subalit pinag-iingat pa rin ng mga taga-DOST-Pagasa ang mga kababayang nagbabalak pumalaot sa mga kanlurang baybayin ng Hilagang Luzon hanggang Palawan.

Ayon kay DOST-Pagasa Weather Specialist Gener Quitlong, katamtaman hanggang napakaalon ang mararanasan sa mga nasabing baybayin at ang taas ng pag-aalon ay maaring umabot ng isa hanggang dalawang metro.

Dahil wala nang babala ng bagyo, maaring nang payagan ng Coastguard ang mga kababayan na pumalaot depende sa kondisyon ng karagatan.

Samantala, kahit sandali lang, nakapagdulot ng abala sa byahe ang Bagyong Tino.

Iniulat ng Office of Civil Defense na may 124 pasahero ang naistranded sa Palawan nang masuspinde ang mga biyahe ng Coron-El Nido, Coron-Cuilion, Cuyo-Puerto Princesa at Puerto Princesa – Iloilo kahapon.

Bahagi ito ng patakaran ng Coast Guard tuwing may babala ng bagyo sa kanilang lugar at ng ipinatawag na No-Sail Policy ng Regional Disaster Risk Reduction and Management Council ng Mimaropa. 


18 Nobyembre 2017