Apat na mangingisda, hinahanap ng PCG sa Palawan

Inaalam ngayon ng mga tauhan ng Philippine Coast Guard ang sinapit na apat na mangingisda na naiulat na nawawala sa Palawan noong parating pa lang ang Bagyong Seniang.

Gayumpaman, sa panayam sa Radyo ng Bayan, sinabi ni Coast Guard Spokesperson Armand Balilo na umaasa siya na  sumilong lang ang mga mangingisda gaya ng ginawa isang grupo ng mga dayuhang bisita nitong Martes nang makasagupa ng masungit na panahon sa karagatan.

Naiulat na may isang grupo ng dayuhan na kinabibilangan ng Australyano, Thai, Pranses at Vietnamese ang nagtangkang lumapit sa El Nido port nitong Martes para mamasyal.

Pero para matiyak ang kaligtasan ng kanyang mga pasahero sa mga malalakas na alon, minabuti ng kapitan ng motorbanca na sumilong muna sa Linapacan Port para makaiwas sa masamang panahon at maipaayos din ang kanilang makina.

Samantala, dalawa ang sinagip  sa pagkalunod ng mga tauhan ng CoastGuard Special Operations Unit at ng kanilang Canine Unit.

Tumaob ang bangkang sinasakyan nina Risaldo Asoque at Mark David habang pabalik ng Puerto Princesa City port sa dako ng Sityo Sibang.

Bago pa man dumating ang bagyo, magkasabay magpalabas ng babala at impormasyon ang mga tauhan ng CoastGuard District Southern Tagalog at CoastGuard District Palawan katulong ang Office of Civil Defense-Mimaropa.

Bukod sa kanila, alertado at naka-monitor din  ang iba pang mga miyembro ng Regional Disaster Risk Reduction and Management Council-Mimaropa gaya ng Department of the Interior and Local Government  Department of Health,  Department of Social Welfare and Development, Department of Public Works and Highways at Bureau of Fire Protection.

Naka-Code White ang mga pagamutan ng DOH at nagpadala ng mga karagdagang tauhan ng Police Regional Office para tumulong sa Operation Center ng Provincial Capitol Operation Center ng Palawan.

Maagang nagposisyon ng 686 na family food packs ang Provincial Disaster Risk Reduction and Management Office ng Palawan sa bayan ng Aborlan.

Unang nagsipag-antabay ang mga disaster risk reduction and management office (DRRMO) ng Puerto Princesa City, Roxas at San Vicente.

Nagsawa ng pre-emptive evacuation naman ang mga DRRMO ng Agutaya at Roxas sa mga kababayang nasa bahaing lugar.

31 Disyembre 2014

Palawan at RDRRMC-Mimaropa, naka-antabay na kay Seniang

                                                  Ang larawan ay mula sa Pagasa-DOST

Binabantayan ngayon ng Regional Disaster Risk Reduction and Management Council-Mimaropa (RDRRMC-Mimaropa) at ng Provincial Disaster Risk Reduction and Management Office ng Palawan (Palawan PDRRMO) ang pagkilos ng Bagyong Seniang.

Signal No. 2 na umiiral sa Palawan at sa isla ng Cuyo samantalang Signal No. 1 sa Calamian group of Island alinsunod sa Severe Weather Bulletin No. 1 ng Pagasa-DOST.

Alertado na ang operation center ng Palawan PDRRMO at ang mga rescue unit ng lalawigan.
Naka-standby na rin ang mga ahensiya ng DILG, DSWD,DOH, PNP, BFP at iba pang mga miyembro ng RDRRMC -Mimaropa.

Nakataas sa White Code ang mga pagamutang nasa ilalim ng DOH samantalang tiniyak naman ng Department of Agriculture ang mga butong pampalit sa mga pananim na masisira kung saka0-sakali.

Namahagi na rin ng mga impormasyon tungkol sa bagyo ang Coast Guard District Southern Tagalog at ang Coast Guard District Palawan.

Sa ulat ng RDRRMC-Mimaropa (Sitrep No. 1 Effects of TS Seniang), suspindido ang operasyon sa pantalan ng mga sumusunod na mga biyahe: Dangay Port (Oriental Mindoro) papuntang Caticlan Port (Iloilo); Roxas Romblon port (Romblon) - Cajidiocan port (Sibuyan island); Puerto Princesa Port-Cuyo  papuntang Iloilo at Coron (Palawan)-Manila.

Sa ulat naman ng Coast Guard Station - Oriental Mindoro at Coast Guard Station Romblon, umabot sa 2,150 (1,800 sa Oriental Mindoro samantalang 350 naman sa Romblon)  ang bilang mga pasaherong pansamantalang pinahimpil sa mga pantalang kani-kanilang nasasakupan.

Anim na put anim na rolling cargoes ang naistranded sa Oriental Mindoro.

Anim na sasakyang pandagat ang nakahimpil naman sa pantalan ng Oriental Mindoro at isa sa Romblon.

Para sa karagadagang impormasyon hinggil sa mga operasyon ng pantalan, tumawag sa Office of Civil Defense - Mimaropa (043- 723 4248).

Ang OCD-Mimaropa ay maari ding sulatan sa email: ocd4_mimaropa@yahoo.com o kaya ay region4b@ocd.gov.ph. #

30 Disyembre 2014

Bagyong Seniang bumilis, papunta na sa dako ng Cuyo

Ang larawan ay mula sa Pagasa-DOST

Bumilis ang pagtawid ng Bagyong Seniang papuntang Mimaropa partikular na sa dako ng Cuyo Island.

Mula sa 15 kilometro bawat oras, naging 19 kilometro bawat oras ang pagratsada ng bagyo bagamat nananatili ang lapad ng bagyo sa 300 kilometro, ang lakas ng hangin sa 65 kilometro bawat oras malapit sa gitna at pagbugso sa 80 kilometro bawat oras.

Huling namataan ng Pagasa-DOST ang bagyo sa layong 108 kilometro timog kanluran ng Iloilo City kaninang ika-apat ng hapon.

Tinataya ng Pagasa-DOST na mamamataan ang bagyong Seniang sa layong 110 kilometro kanluran ng Puerto Princesa City bukas ng hapon (Miyerkules, Ika-31 ng Disyembre)  

Dahil dito, itinaas ng Pagasa-DOST sa Public Storm Warning Signal No. 2 ang babala sa Palawan at sa isla ng Cuyo batay sa Severe Weather Bulletin No.11.

Nananatili naman sa PSWS No. 2 ang babala sa Calamian group of islands.

Malapad ang bagyo kaya lahat ng mga bayan na madadaanan nito ay maaring makaranas ng pito't kalahati at labing limang milimetrong pag-ulan.

Lalong pinag-iingat ng awtoridad ang mga kababayan sa mga mababa at bulubunduking lugar na nasa ilalim ng Signal No. 2 at Signal No. 1 sa posibleng pagbaha at pagguho ng lupa.

Sa mga mangingisda at mga nagmamay-ari ng bangkang maliliit, nakikiusap ang mga opisyal na huwag na munang pumalaot dahil kaya ng bagyo na makalikha ng mga dambuhalang bagyo na may taas na limang metro.

Pinapayuhan din ang mga residente sa mga posibleng daanan ng bagyo na sundin ang mga gabay ng kani-kanilang disaster risk reduction and management office.

Magbibigay ang Pagasa-DOST ng panibagong pagtaya ng panahon mamayang 11 ng gabi.

30 Disyembre 2014

Pre-emptive Evacuation, inirekumenda ng RDRRMC sa mga LGU ng Mimaropa

QUEZON CITY, Disyembre 05 (PIA) --- Hinikayat ng Regional Disaster Risk Reduction and Management Council-Mimaropa (RDRRMC - Mimaropa) ang mga lokal na pamahalaan sa rehiyon na magsagawa ng pre-emptive evacuation o maagang paglilikas sa mga lugar na peligroso bago dumating ang Bagyong Ruby.

Kabilang na rito ang mga mababa at bahaing lugar kabilang ang mga dalampasigan pati ang mga bulubundukin pook na pwedeng pangyarihan ng landslide.

Kasama din sa memorandum na nilagdaan nina Office of Civil Defense Mimaropa Regional Director Eugene Cabrera at Interior and Local Government – Mimaropa Regional Director James Fadrilan ang panawagan sa mga lokal na pamahalaan na ipatupad ang No Sail policy o ang pagbabawal sa pagpalaot ng mga mangingisda o kaya ng mga nagmamay-ari ng mga sasakyang pandagat.

Ang Romblon ang unang lalawigan ng Mimaropa na sumailalim sa Public Storm Signal No. 1. 

Pero kung tutuusin, halos buong Mimaropa ang sasagasaan ng Bagyong Ruby.

Sa paliwanag ng Pagasa-DOST nitong Biernes, kabilang ang mga lalawigan ng Mimaropa sa mga direktang madadaanan ng mata ng bagyo na may bitbit na malalakas na hangin.

Dahil sa lakas ng hangin, may posibilidad na magkaroon ng mga dambuhalang alon o storm surges sa mga dalampasigan ng mga islang probinsya ng Mimaropa.

Sabi ng Pagasa-DOST, Sabado ng gabi o Linggo ng umaga pa inaasahang tatama sa kalupaan ng Hilagang kabisayaan ang Bagyong Ruby.

Pagkatapos, Kabikulan ang pupuntahan muna ng bagyo bago sumaglit sa Metro Manila.

Pagkagaling sa mainland Luzon, unang tutumbukin ng Bagyong Ruby ang Romblon sa Lunes.

Inaasahang ng Pagasa DOST na Miyerkules pa makakalabas ng bansa ang Bagyong Ruby. (LP)