PAGASA Gale Warning No. 3

Pagasa-DOST, nagbabala ng malakas na hangin, napakaalong kanlurang babaybayin ng Timog-Luzon

LUNGSOD QUEZON , Ika-19 ng Disyembre (PIA) ---Hinikayat ng Pagasa-DOST ang mga mangingisda sa Occidental Mindoro at sa Palawan na huwag munang pumalaot ngayong araw sa kanilang mga karagatan dahil magiging maalon hanggang napakaalon sa kanlurang baybayin.

Ang  kanlurang baybayin ay makakaranas ng maulap na himpapawid na may magaan hanggang katamtaman pag-ulan at manaka-nakang kulog at kidlat.

Ang lakas ng hangin ay nasa pagitan ng 51-63 kilometro bawat oras at ang malakas hanggang sa gale force wind ay may kinalaman sa paglakas ng amihan o Northeast monsoon.

Sa ilalim ng mga nasabing kondisyon,  ang taas ng alon ay aabot sa pagitan ng 3.4 hanggang  4.5 metro.

Inalerto din ng Pagasa-DOST ang mga nagmamay-ari o operator ng mga malalaking sasakyang pandagat hinggil sa maalong karagatan.

Samantala, ang  Oriental Mindoro, Marinduque at  Romblon ay magiging maulap na may magaan hanggang katamtaman na pag-ulan.

Katamtaman hanggang malakas na pag-ihip ng hangin ang maghahari sa mga nasabing lalawigan at ang katubigan sa kanilang baybayin ay magiging katamtaman hanggang sa napaka-alon. (LP)

NDRRMC Update hinggil sa Bagyong Lando

NDRRMC-Opcen: Pinaghahanda na ni NDRRMC executive director Usec Alexander Pama ang mga kababayan natin sa mga lugar na may typhoon signal ngayon pa lang upang mapaghandaan ang posibleng epekto ng pagtama sa kalupaan ng Typhoon Lando.Sa Linggo ng madaling araw ito inaasahang tatama sa parteng Aurora,Isabela.Maaaring magdulot itong bagyo ng malakas na hangin,pagbaha at storm surge.(report from PIA/fgm as of 12:37 noon today)

NDRRMC-Opcen: Sa ginagawang Pre-Disaster Risk Assessment (PDRA), iniulat ng PAGASA na maaaring tumama sa Aurora,Isabela area sa linggo Oct 18 bandang 4 hanggang 8 ng umaga.Sa Sabado ng 2pm mararamdaman na ng pag ulan at bugso ng hangin sa nasabing lugar. Tinatayang aabot sa 185 kph ang lakas ni Typhoon Lando kapag tumama sa kalupaan.(report form PIA/fgm as of 12:37 noon today)

Magsasagawa ng press conference ang PAGASA-DOST mamayang alas-5 ng hapon: posibleng isahimpapawid ng mga himpilan ng TV at radyo.

Bagyong Seniang bumilis, papunta na sa dako ng Cuyo

Ang larawan ay mula sa Pagasa-DOST

Bumilis ang pagtawid ng Bagyong Seniang papuntang Mimaropa partikular na sa dako ng Cuyo Island.

Mula sa 15 kilometro bawat oras, naging 19 kilometro bawat oras ang pagratsada ng bagyo bagamat nananatili ang lapad ng bagyo sa 300 kilometro, ang lakas ng hangin sa 65 kilometro bawat oras malapit sa gitna at pagbugso sa 80 kilometro bawat oras.

Huling namataan ng Pagasa-DOST ang bagyo sa layong 108 kilometro timog kanluran ng Iloilo City kaninang ika-apat ng hapon.

Tinataya ng Pagasa-DOST na mamamataan ang bagyong Seniang sa layong 110 kilometro kanluran ng Puerto Princesa City bukas ng hapon (Miyerkules, Ika-31 ng Disyembre)  

Dahil dito, itinaas ng Pagasa-DOST sa Public Storm Warning Signal No. 2 ang babala sa Palawan at sa isla ng Cuyo batay sa Severe Weather Bulletin No.11.

Nananatili naman sa PSWS No. 2 ang babala sa Calamian group of islands.

Malapad ang bagyo kaya lahat ng mga bayan na madadaanan nito ay maaring makaranas ng pito't kalahati at labing limang milimetrong pag-ulan.

Lalong pinag-iingat ng awtoridad ang mga kababayan sa mga mababa at bulubunduking lugar na nasa ilalim ng Signal No. 2 at Signal No. 1 sa posibleng pagbaha at pagguho ng lupa.

Sa mga mangingisda at mga nagmamay-ari ng bangkang maliliit, nakikiusap ang mga opisyal na huwag na munang pumalaot dahil kaya ng bagyo na makalikha ng mga dambuhalang bagyo na may taas na limang metro.

Pinapayuhan din ang mga residente sa mga posibleng daanan ng bagyo na sundin ang mga gabay ng kani-kanilang disaster risk reduction and management office.

Magbibigay ang Pagasa-DOST ng panibagong pagtaya ng panahon mamayang 11 ng gabi.

30 Disyembre 2014

Mga taga-Palawan, pinag-iingat kay Bagyong Seniang

                                                                                   Ang mapa ay mula sa Pagasa-DOST

Araw na lang binibilang at magpapalit na ng taon. 

Gayumpaman, hindi dapat maging kampante ang mga kababayan dahil may bahagi ng Mimaropa partikular ang Palawan (masdan ang mapa sa itaas) na maaring daanan ng Bagyong Seniang na bumabagtas ngayon sa ilang parte ng Kabisayaan at Kamindanawan.

Sa pagtaya ng Pagasa-DOST (Severe Weather Bulletin No. 10-A), mamamataan ang bagyong Seniang sa layong 70 kilometro bawat oras timog-timog silangang ng Puerto Princesa City bukas, Miyerkules (ika-31 ng Disyembre) ng umaga.

Malapad ang kaulapan ni Seniang---300 kilometro ang diyametro---at lahat ng lugar na babagtasin nitong bagyo ay maaring makaranas ng  pito't kalahati hanggang labing limang milimetrong pag-ulan kada oras.

Taglay ng Bagyong Seniang ang lakas ng hangin na 65 kilometro bawat oras at pagbugso ng aabot sa 80 kilometro bawat oras, kumikilos si Seniang pa-kanluran sa bilis na 15 kilometro bawat oras.

Dahil dito, Itinaas ng ahensya ang Public Storm Warning Signal No. 1 sa buong Palawan kasama ang mga isla ng Calamian at Cuyo.

Pinag-iingat ng Regional Disaster Risk Reduction and Management Council ng Mimaropa ang mga kababayan sa posibleng biglaang pagbaha at pagguho ng lupa sa mabababa at bulunbunduking lugar.

Hinihikayat din ng mga awtoridad ang mga nagmamay-ari ng maliliit na bangka na iwasan munang pumalaot dahil ang bagyong Seniang ay may kakayahang lumikhang mga dambuhalang along na aabot sa taas na limang metro.

Abangan sa radyo, TV at sa internet ng mga pinakahuling pagtaya ng Pagasa-DOST sa Bagyong Seniang. #

30 Disyembre 2014

Bagyong Ruby patawid ng Mimaropa: mga kababayan, pinag-iingat ng NDRRMC

Ang larawang ito ay mula sa Pagasa-DOST

Pinaghahanda ng National Disaster Risk Reduction and Management Council ang mga bayan sa Hilagang Mindoro dahil ito ang susunod na dadaanan ng Bagyong Ruby mamayang gabi.

“Paalala natin sa ating mga kababayan, kung hindi importante ang inyong lakad ay manatili sa inyong tahanan. Kung mayroon pa kayong kailangan kumpunuin, ngayon na po...this is the time na dapat gawin yan at maghanda po kayo ng inyong emergency survival kits para kung saka-sakali kailangan ninyo agad mag-evacuate ay mayroon po kayong magagamit agad para sa inyong pamilya,” sabi ni NDRRMC Public Affairs Chief Romina Marasigan kaninang umaga sa isang briefing.

Napag-alaman na may mga lokal na pamahalaan tulad sa Oriental Mindoro ang magsasagawa ng force evacuation ngayong maghapon sa mga lugar na bahain, pagguhuan ng lupa o kaya ay madaanan ng daluyong o storm surge.

Sa huling ulat ng Pagasa-DOST kaninang alas-5 ng umaga, binaybay ng Bagyong Ruby kagabi at kaninang madaling araw ang Sibuyan Sea sa halip na dumaan sa kalupaan ng alinmang isla sa Romblon.

Gayumpaman, dahil sa lapad ng bagyo, nakaranas pa rin ng malakas ng hangin at pag-ulan ang lalawigan at iba pang lugar na malapit sa dinadaanan ni Ruby.

Sa loob ng kanyang 450 kilometrong dayametro, aabot sa 5-15 millimetro ng ulan kada oras ang kayang ibuhos ng bagyo.

Tinataya ng Pagasa-DOST na mga bandang ika-6 hanggang ika-8 ngayong gabi darating ang Bagyong Ruby sa Hilagang Mindoro kung hindi magbabago ang direksyon nito.

Namataan ang mata ng Bagyong Ruby kaninang alas-4 ng umaga sa layong 110 kilometro Hilagang-kanluran ng Masbate City o 50 kilometro Hilagang-silangan ng Romblon, Romblon.

Taglay ng bagyo ang lakas ng hangin na 120 kilometro bawat oras na may pagbugso ng 150 kilometro bawat oras.

Tinataya rin na kikilos ang Bagyong Ruby sa kanluran-hilagang-kanluran sa bilis na 10 kilometro bawat oras.

Dahil dito, pinairal ng Pagasa-DOST ang Public Storm Warning Signal No. 3 sa Oriental Mindoro, Occidental Mindoro pati Lubang Island, Marinduque, Romblon, Burias Island, Batangas, Laguna, Cavite at Katimugang Quezon.

Public Storm Warning Signal No. 2 naman sa Masbate, Calamian Group of Islands, Bulacan, Bataan, Hilagang Quezon, Rizal, Camarines Sur, Camarines Norte, Metro Manila, Semirara Island, Aklan at Capiz.

Inaasahan ng Pagasa-DOST na ganap na mararanasan ng Metro Manila ang pagbuhos ng ulan at hangin mga dalawang oras matapos makaraan ang Bagyong Ruby sa Hilagang bahagi ng Mindoro.

Ang mga lalawigan sa nasa ilalim ng Signal No. 3 at Signal No. 2 ay posibleng maharap sa biglaang pagbaha at pagguho ng lupa sa mga mababa at bulunbunduking lugar.

Ang mga baybayin naman ng mga lugar na ito ay pwedeng pangyarihang ng mga dambuhalang alon: mga dalawang metrong taas ng tubig sa Signal No. 3 at isang metro naman sa Signal No. 2.

Nakataas naman sa Public Storm Warning Signal No.1 ang Polillo Island, Zambales, Nueva Ecija, Tarlac, Pampanga, Catanduanes, Hilagang Palawan pati isla ng Cuyo, Albay, Sorsogon, Northern Samar, Iloilo, Antique, Biliran at Bantayan Island.

Ayon sa Pagasa-DOST, makupad ang andar ng Bagyong Ruby dahil may mga pangyayari gaya ng pagpasok ng Amihan (Northeast Monsoon) ang nakakaapekto sa kanyang pagkilos kaya maaring abutin ng ilang araw pa ang bagyo sa bansa.

Posibleng huwebes pa makalabas ng Pilipinas ang Bagyong Ruby batay na rin sa pagtaya ng Pagasa-DOST, ayon pa kay Marasigan.

Ang Amihan at ang Bagyong Ruby ang mga dahilan para maging maalon hanggang sa napakaalon ng karagatan sa Mimaropa kaya pinapayuhan ng mga awtoridad ang mga nagmamay-ari ng mga maliliit na sasakyang pandagat na huwag munang pumalaot. (LP)

08 Disyembre 2014, 9:30 am

Palace suspends work in gov't, classes in NCR, Mimaropa and Calabarzon

Malacanang on Monday suspended work in all government offices in Metro Manila (NCR or National Capital Region), Calabarzon (Region IV-A) and Mimaropa (Region IV-B) due to the impending passage of Typhoon Ruby in these areas tonight.

Also suspended today, December 8, are classes in all levels in the same regions, according to Deputy Presidential Spokesperson Abigail Valte based on an action made by Executive Secretary Paquito N. Ochoa.

But Usec. Valte clarified that the suspension does not cover those who are involved in the delivery of basic and health services, disaster response and other vital public services.

Pagasa-DOST on Sunday night raised Public Storm Warning Signal No. 1 over Marinduque, Oriental Mindoro, Occidental Mindoro including Lubang Island, Romblon, Batangas, Laguna, Cavite and Southern Quezon.

Public Storm Warning Signal No. 2 is in effect over Calamian Group of Islands, Rizal, the rest of Quezon and Metro Manila.

Only Northern Palawan including Cuyo island remained under Public Storm Signal No.1.

Usec Valte likewise urged private sector in the three regions to consider the forecasted weather conditions in favor of the welfare and safety of their employees. (LP)

Dalawang ospital sa Palawan, naka-antabay na rin sa Bagyong Ruby

Halaw sa 11 am report ng Pagasa-DOST

QUEZON CITY, Disyembre 4 (PIA) --- Dalawang ospital sa Palawan ang nasa ilalim ng Code Blue bilang paghahanda sa pagdaan ng Bagyong Ruby ngayong weekend.

Ang mga ito ay ang  Ospital ng Palawan (Puerto Princesa City) at Culion Sanitarium and General Hospital (Culion Island).

Kapag nakataas ang Code Blue, paliwanag ng Department of Health, kalahati ng kabuuang bilang mga tauhan ng ospital ay kailangan pumasok sa trabaho.

Sa sandaling umakyat ang alerto sa Code Red, lahat ng personnel ng ospital ay kailangan nasa kani-kanilang puwesto.

Batay sa ulat ng Pagasa-DOST, Sabado pa inaasahang tatama sa kalupaan ng Samar ang Bagyong Ruby.

Mula Samar, ayon sa Pagasa-DOST, sasagasaan ng bagyo ang mga bayan sa gitnang Kabisayaan hanggang sa makalusot sa Mimaropa partikular sa Romblon at sa dalawang Mindoro batay sa forecast ng Pagasa-DOST kaninang umaga.

Tinatayang ng Pagasa-DOST na linggo pa lalabas ng West Philippine Sea ang bagyong Ruby. 

Sa huling monitoring ng Pagasa-DOST, bumagal ang ratsada ng Bagyong Ruby sa karagatan kaya wala pang pinsalang maidudulot sa alinman panig ng bansa.

Gayumpaman, maaga palang ay hinihikayat na mga awtoridad ang mga taga-Mimaropa na maghanda sa bagyo. (LP)

Ilang probinsya sa Mimaropa, apektado ng habagat: ilang mga byaheng pandagat, sinuspinde para iwas disgrasya

ORIENTAL MINDORO, Setyembre 19 (PIA): Bagamat walang babala ng bagyo sa Mimaropa, hindi pa rin nakaligtas sa mga malalakas na ulan ang ilang mga lalawigan ng rehiyon.

Ayon sa Pagasa-DOST, nahahatak ng bagyong Mario ang umiiral na Hanging Habagat pa kanluran kaya inulan at naapektuhang pagbyaheng pandagat sa mga lalawigan ng Mindoro, Marinduque at ilang bahagi ng hilagang Palawan.

Kaya naman agad nagdesisyon ang mga awtoridad sa mga pantalan at ang iba't ibang istasyon ng  Coast Guard District Southern Tagalog at Philippine Coast Guard (PCG) - Palawan na suspindihin ang mga byahe sa kanilang nasasakupan.

Sa Batangas Port, inulat ng Philippine Coast Guard (PCG)- Batangas at PCG-Abra De Ilog  na nasuspinde ang mga byaheng papunta at pabalik ng Calapan City Port (Oriental Mindoro) at Abra De Ilog (Occidental Mindoro).

Pero bago nasuspinde ang lahat ng byahe papuntang Batangas, nakapalaot pa ang isang barko ng Montenegro Lines kaninang umaga dakong alas otso y media.

Sa area ng PCG-Caminadawit sa Sa San Jose, Occidental Mindoro, kinansela nila ang lahat ng kanilang byahe.

Masamang panahon din ang dahilan kaya walang nagbyaheng maliliit na sea-vessel at motorbanca  sa Romblon, Romblon ayon sa PCG-Romblon.

Mahina man ang ulan sa dako ng Coron, Palawan, sinabi ng PCG-Coron na walang pinayagang pumalaot dahil sa paglakas ng hangin at alon sa karagatan.

Medyo lumaki ang mga alon sa karagatang nasasaklaw ng PCG-Dalahican sa Lucena kaya nasuspinde rin ang mga byahe don.

Suspindido rin ang mga byahe mula sa mga pantalan ng Banalacan at Cawit papuntang Dalahican batay na rin sa Sitrep 1 at Sitrep 2 ng Office of Civil Defense-Mimaropa. (LP)

Pre-emptive evacuation, ipinatupad sa Marinduque at Occidental Mindoro

Umabot na sa 737 na pamilya ang nailikas ng mga lokal na pamahalaan ng Marinduque at Occidental Mindoro bilang pag-iwas sa posibleng disgrasyang mangyari sa pagdaan ng Bagyong Glenda.

Sa ika-limang Situation Report ng Office of Civil Defense-Mimaropa, karamihan ng mga evacuees ay mula sa Marinduque gaya ng Boac (279 na pamilya) at Gasan (205 na pamilya).

Inaalam pa ng OCD-Mimaropa ang bilang ng mga inilkas sa mga bayan ng Torrijos at Santa Cruz.

May 70 pamilya rin ang nailikas sa Abra De Ilog, Occidental Mindoro.

Hinggil naman sa suplay ng kuryente, nakaranas ng interruption ang mga bayan ng Buena vista, Boac at Gasan ng Marinduque mula hapon hanggang gabi nitong Martes.

Nagkaroon din ng power interruption sa bayan ng Magsaysay, Occidental Mindoro at sa Banton, Romblon.

Kasama pa rin ang Marinduque sa mga lalawigan kung saan pinaiiral ang Public Storm Warning Signal (PSWS) No. 3 samantalang ang mga hilagang bahagi ng Occidental Mindoro at ng Oriental Mindoro ay nasa ilalim ng PSWS No. 2 alinsunod sa Severe Weather Bulletin No. 11 ng Pagasa-DOST.

Ang natitirang bahagi ng Oriental Mindoro at Occidental Mindoro ay nasa ilalim ng Signal No. 1.

Kapag nakataas ang Signal No. 3, inaasahang taglay ng bagyo ang lakas ng hangin mula 101 hanggang 185 kilometro bawat oras sa loob ng 18 oras matapos mailabas ang bulletin ng Pagasa-DOST.

Sa Signal No. 2, taglay ng bagyo ang lakas ng hangin na 61 hanggang 100 kilometro bawat oras sa loob ng 24 oras mula nang mailabas ang bulletin ng Pagasa-DOST.

Kapag nasa ilalim ng Signal No. 1, ang mararanasang hangin sa mga apektadong lugar ay may lakas na 30 hanggang 60 kilometro bawat oras.

Sa pagtaya ng Pagasa-DOST, kumikilos ang bagyong Glenda sa pa-kanluran hilagang kanlurang direksyon sa bilis na 19 na kilometro bawat oras.

PIA-Mimaropa BROADCAST NEWS

Lyndon Plantilla, 09392974857 & 02-9203922

16 July 2014