Pagbangon ng mga binagyong probinsya sa Mimaropa, sinisikap na mapabilis ng mga awtoridad

LUNGSOD QUEZON, Ika-19 Disyembre (PIA) --- Handang tumanggap ng tulong ang pamahalaan sa mga nagmamay-ari ng truck para madagdagan ang mga maghahatid ng trapal at mga relief good para sa mga nabiktima ng bagyong Nona.

Ito ang naging panawagan ni Undersecretary Alexander Pama ng National Disaster Risk Reduction and Management Council sa kanyang mga panayam.

Kabilang sa mga lalawigang pagdadalhan ay mga probinsya ng Mindoro, Romblon at Marinduque.

Samantala, sinisikap ng mga awtoridad na maisaayos ang mga kababayan sa Mimaropa matapos ang pagragasa ng Bagyong  Nona.

Sa Sitrep No. 14 ng Office of Civil Defense-Mimaropa, regular na ang operasyon ng mga pantalan sa rehiyon.

Ang kuryente ay naibalik na sa kalakhang Occidental Mindoro gayundin sa ilang mga bayan ng Oriental Mindoro gaya ng Bongabong, Roxas, Mansala, Bulalacao at Calapan City.

May kuryente na rin sa Gasan at Marinduque.

Nalinis at madadaanan ang lahat ng kalsada sa Marinduque at Oriental Mindoro.

Nasa ilalim ng State of Calamity ang Oriental Mindoro at ang Torrijos, Marinduque para may pondong magagamit sa rehabiltasyon sa mga binagyong lugar.   

Umabot sa  121,362 na kataong (o 29, 261 na pamilya) na lumikas at kinalinga sa mga evacuation area. (LP)