Senior Citizens’ Health Fair: panibagong parangal kina Lola’t Lolo sa Mimaropa

Una, ang Mimaropa ay mayroon UNA--- Ulirang Nakatatanda Awards--- kung saan kinikilala ang kontribusyon ng mga nakatatanda sa  sa kanilang samahan, pederasyon, pamayanan at sa buong rehiyon.

Ngayon, ang Mimaropa ay mayroon nang Senior Citizens’ Health Fair na inilunsad ng Department of Health sa Boac, Marinduque.

Ayon kay DOH Mimaropa Regional Director Eduardo Janairo, nilalayon din ng Senior Citizens’ Health Fair na bigyan ng pagkilala sa mga nakatatandang  patuloy na nagbabahagi ng kanilang kaalaman, kasanayan at karanasan sa mga nakababata para sa ikauunlad ng pamayanan.

Pero ang naiiba sa Senior Citizens’ Health Fair, binibigyan diin ang pagtuturo at pagpapataas ng kaalaman ng mga nakatatanda sa mga nilalaman ng  Republic Act No. 9994 o mas kilala bilang “Expanded Senior Act of 2010.

Sa ilalim ng batas, mababatid ang mga pribilehiyo at mga karagdagan benipisyo sa mga nakatatanda.

Gayundin, hangad din ng Senior Citizen’s Health Fair na maipakalat ang mga paraan para maging malusog ang mga kababayan habang nagkaka-edad.

Ang Senior Citizens’Health Fair ay inilunsad ngayong Huwebes sa Bayan ng Boac, Marinduque.

Tampok sa Senior Citizens’Health Fair ang Ballroom Dancing, Group-line dancing at ang kambal patimpalak na Kisig at Gandang Walang Kupas pageant.

May 400 kababayan mula sa iba't ibang munisipyo ng Marinduque ang dumalo sa paglulunsad ng Senior Citizens'Health Fair.

Idinagdag ni Director Janairo na kanilang dadalhin ang Senior Citizens’Health Fair sa iba pang lalawigan para makinabang ang iba pang mga kababayan sa Mimaropa. 

 #