Palawan at RDRRMC-Mimaropa, naka-antabay na kay Seniang

Ang larawan ay mula sa Pagasa-DOST

Binabantayan ngayon ng Regional Disaster Risk Reduction and Management Council-Mimaropa (RDRRMC) at ng Provincial Disaster Risk Reduction and Management Office ng Palawan (Palawan PDRRMO) ang pagkilos ng Bagyong Seniang.

Signal No. 2 na umiiral sa Palawan at sa isla ng Cuyo samantalang Signal No. 1 sa Calamian group of Island alinsunod sa Severe Weather Bulletin No. 1 ng Pagasa-DOST.

Alertado na ang operation center ng Palawan PDRRMO at ang mga rescue unit ng lalawigan.
Naka-standby na rin ang mga ahensiya ng DILG, DSWD,DOH, PNP, BFP at iba pang mga miyembro ng RDRRMC -Mimaropa.

Nakataas sa White Code ang mga pagamutang nasa ilalim ng DOH samantalang tiniyak naman ng Department of Agriculture ang mga butong pampalit sa mga pananim na masisira kung saka0-sakali.
Namahagi na rin ng mga impormasyon tungkol sa bagyo ang Coast Guard District Southern Tagalog at ang Coast Guard District Palawan.

Sa ulat ng RDRRMC-Mimaropa (Sitrep No. 1 Effects of TS Seniang), suspindido ang operasyon sa pantalan ng mga sumusunod na mga biyahe: Dangay Port (Oriental Mindoro) papuntang Caticlan Port (Iloilo); Roxas Romblon port (Romblon) - Cajidiocan port (Sibuyan island); Puerto Princesa Port-Cuyo  papuntang Iloilo at Coron (Palawan)-Manila.

Sa ulat naman ng Coast Guard Station - Oriental Mindoro at Coast Guard Station Romblon, umabot sa 2,150 (1,800 sa Oriental Mindoro samantalang 350 naman sa Romblon)  ang bilang mga pasaherong pansamantalang pinahimpil sa mga pantalang kani-kanilang nasasakupan.

Anim na put anim na rolling cargoes ang naistranded sa Oriental Mindoro.

Anim na sasakyang pandagat ang nakahimpil naman sa pantalan ng Oriental Mindoro at isa sa Romblon.

Para sa karagadagang impormasyon hinggil sa mga operasyon ng pantalan, tumawag sa Office of Civil Defense - Mimaropa (043- 723 4248).

Ang OCD-Mimaropa ay maari ding sulatan sa email: ocd4_mimaropa@yahoo.com o kaya ay region4b@ocd.gov.ph. #

30 Disyembre 2014

RDRRMC ng Mimaropa, pinaghahandaan si TD Queenie

Ang larawang ito ay mula sa PAGASA-DOST

QUEZON CITY, Nobyembre 27 (PIA) --- Hindi pa nakakarating sa Mimaropa ang Tropical Depression Queenie pero  pinaghahanda ng mga miyembro ng Regional Disaster Risk Reduction and Management Council ang mga kababayan sa rehiyon  lalo na yung mga taga Palawan na maghanda na.

Nakataas ang Public Storm Signal Number 1 sa Calamian Group of islands, Cuyo Islands at sa nalalabing bahagi ng Palawan.  

Pinasabihan na ang mga may-ari ng mga malalaking at maliliit na sasakyang pandagat na ipagpaliban muna ang paglaot habang hindi nakakalagpas ang TD Queenie.

Tulad ng dati, nakikipag-ugnayan na ang Office of Civil Defense (Mimaropa) sa lahat ng response organizations para paghandaan ang parating na tropical depression.

Alertado na rin ang mga field office ng Department of the Interior and Local Government.
Naka-antabay na rin ang mga Social Welfare and Development teams sa buong rehiyon at maging ang kanilang quick reaction teams.

Ayon pa sa Department of Social Welfare and Development - Mimaropa, nakaposisyon na ang kanilang mga relief goods sa mga malalayong island barangays.

Mayroong 18,766 family food pack ngayong ang DSWD-Mimaropa.

Nasa Code White ang status ng Deparment of Health - Mimaropa na patuloy ang pagmamatyag sa kanilang mga tanggapan sa iba't ibang lalawigan.

Nakahanda na rin ang mga tauhan ng Provincial Regional Office ng PNP-Mimaropa kabilang na rito ang kanilang search and rescue team.

Nakakalat naman sa iba't ibang district office ang mga asset ng Department of Public Works and Highways gaya ng heavy equipment para makatulong sa clearing operation.

Gaya ng OCD-Mimaropa, wala tigil ang Coast Guard District Southern Tagalog  ng mga weather bulletins sa kani-kanilang substations sa bawat probinsya.

Naka-stand by naman ang mga tauhan ng Bureau of Fire Protection kung kakailangan sa mga mga rescue operations: mayroon silang mga emergency medical units bukod sa mga fire-fighting equipments at personnel.

Tiniyak naman ng Department of Agriculture na mayroon silang mga planting materials na pwedeng ipamalit sa mga pananim na posibleng masira kapag naminsala ang TD Queenie.

Bagamat wala sa ilalim ng public storm signal number 1, naghanda na rin ang mga Provincial Disaster Risk Reduction and Management office ng Romblon at Oriental Mindoro  sa pagdating ng TD Queenie na may pito hanggang labinglimang millimetrong ulan sa loob ng kanyang tatlong daang kilometrong diyametro na maaring maging dahilan ng pagguho ng lupa o kaya ay biglaang pagbaha sa mga mabababang at bulubunduking lugar.

At panghuli, ang PIA-Mimaropa naman ang tumutulong sa pagpapakalat ng impormasyon sa mga hakbang na ginagawa ng mga miyembro ng Regional Disaster Risk Reduction and Management Office.

Para sa karagdagang impormasyon, makipag-ugnayan sa OCD-Mimaropa sa (042) 723-4248 o kaya sa ocd4_mimaropa@yahoo.com. (Lyndon Plantilla)

Palawan, binabantayan ang pagkilos ng TD Queenie

                                                     Ang larawan rito ay mula sa PAGASA-DOST


QUEZON CITY, Nobyembre 27 (PIA) --- Pinag-iingat ng Regional Disaster Risk Reduction and Management Council ang mga kababayang taga-Palawan partikular na yung mga naninirahan sa Hilagang Bahagi sa pagdaan ng Tropical Depression Queenie.

Kaninang alas diyes ng  umaga, namataan ng PAGASA ang TD Queenie sa layong 120 hilangang kanluran ng Dumaguete City.

Bagamat patawid pa lang ngayon sa Sulu Sea, mamayang gabi ay magpaparamdam sa Palawan si  TD Queenie  na may lakas na 55 kilometro bawat oras malapit sa gitna.

Inaasahang tatahakin ng TD Queenine ang pakanlurang direksyon sa bilis na 24 kilometro bawat oras.

Kaya naman nakataas ang Public Storm Signal Number 1 ngayon sa Palawan, Calamian Group of Islands at pati sa isla ng Cuyo.

Tinataya ng Pagasa na may magbubuhos ng pito hanggang labing limang milimetrong ulan ang TD Queenie sa loob ng kanyang 300 kilometrong diyametro.

Walang tigil sa kapapa-alala ang mga awtoridad sa mga kababayang naninirahan sa mga mabababa at bulubunduking lugar sa Palawan na nasa ilalim ng Public Storm Signal Number 1 at maging sa mga katulad na lugar sa Romblon at sa dalawang lalawigan ng Mindoro na mag-ingat at maghanda sa biglaang pagbaha at pagguho ng lupa.

Iniulat ng  Office of Civil Defense-Mimaropa (sa kanilang Sitrep No. 2),  na suspindido na ang port operations ng rutang Puerto Princesa-Cuyo-Iloilo at rutang Coron-Palawan-Manila.

Pinayuhan naman ng Coast Guard District - Palawan ang mga operator ng  malalaki at maliit na sasakyang pandagat na ipagpaliban muna ang mga biyahe habang papalapit ang TD Queenie.

Iniulat naman ng Palawan Provincial Disaster Risk Reduction and Management Office na naka-alerto na kanilang operation center,  mga Disaster Risk Reduction and Management Offices sa iba't-ibang bayan, pati mga response group sa lalawigan kabilang na rito ang Palawan 165.

Para sa karagdagang detalye, tumawag sa OCD-Mimaropa sa (042) 723-4248 o kaya sumulat sa ocd4_mimaropa@yahoo.com.

Ilang nasuspindeng byahe sa Mimaropa dahil sa masamang panahon, balik operasyon na

Halaw sa Sitrep No. 5 Effects of TY LUIS ng Mimaropa Regional Disaster Risk Reduction and Management Council.

15 Setyembre 2014

BUMALIK na sa operasyon ang ilang mga byahe sa Mimaropa na sinuspinde dahil sa pagtaas ng mga alon sa karagatan at masamang panahon bunga ng habagat at ganun na rin ng Bagyong Luis.

Sa ulat ng Mimaropa Regional Disaster Risk Reduction and Management Council (Mimaropa RDRRMC), balik - operasyon na ang byaheng Puerto Galera  (Oriental Mindoro) papuntang Batangas Port; Banalacan Port (Mogpog, Marinduque) papuntang Dalahican Port (Lucena City) at Poctoy Port (Odiongan, Romblon) papuntang Batangas Port. 

Sa Romblon Port (Romblon, Romblon), nagbiyahe na ang barko ng 2GO samantalang walang pang anunsyo ang Montenegro Lines nang isinulat ang report na ito.

Paliwanag ng Philippine Coast Guard, nasa kamay ng mga shipping line ang pagpadedesisyon kung magbibyahe ang kanilang mga barko kung alanganin ang panahon ngunit walang babalang umiiral sa kanilang mga destinasyon o  panggagaling.

Antimanong suspindido ang mga byahe sa mga pantalan kapag nakataas ang Public Storm Warning Signal No. 1 at kung masama ang panahon sa pantalan o sa distinasyon nito. 

Payo ng Coast Guard sa mga byahero sa Mimaropa, tawagan muna ang mga shipping line na sasakyan at kumpirmahin muna kung magbibiyahe o hindi.

Inaanyayahan ang mambabasa na kumunsulta sa larawan sa itaas o kaya ay tumawag sa Office of Civil Defense - Mimaropa (043-723-4248) hinggil sa mga kalagayan mga pantalan o kaya estado ng mga byahe sa tuwing nagsusungit ang panahon.  (Lyndon Plantilla/ PIA Mimaropa)

Operasyon sa mga pantalan ng Mimaropa, suspendido pa rin

Papalayo na ang Bagyong Glenda, hindi pa rin mairerekumendang magbiyahe sa karagatan papunta sa alinmang lalawigan ng Mimaropa.

Sa ika-walong Sitrep ng Office of Civil Defense-Mimaropa, sinuspinde na rin ng mga pantalan ng Puerto Princesa, Cuyo at Coron ang kanilang mga operasyon gaya ng iba pang mga port sa ibang probinsya noong makalawa para maiwasan ang disgrasya sa pagdaan ng bagyong Glenda.

Matatandang nakasama ang Marinduque sa mga lalawigan isinalalim sa Public Storm Warning Signal (PSWS) No. 3 ang mga hilagang bahagi ng Oriental Mindoro at Occidental Mindoro kasama ang Lubang Island at Marinduque bago pa humapas sa lupa ang bagyo.

Ang Romblon at mga nalalabing bahagi ng dalawang Mindoro ay nalagay sa Signal No. 2.

Umabot na sa 624 ang bilang ng mga na-istranded na mga pasahero at karamihan sa kanila ay nasa Calapan Port.

Nakikipag-ugnayan ang OCD-Mimaropa sa mga lokal na pamahalaan, Coast Guard District at Philippine Ports Authority para maalalayan ang mga naistranded na pasahero sa Calapan at sa iba pang mga pantalan.

Pitong-put-walong rolling cargo, karamihan nasa Calapan port at sa Abra de Ilog port ang na-istranded din.

May 11 sea vessel, kasama ang apat na motor banca sa Coron Port, nakahimpil sa mga pantalan ng Banalacan Port sa Mogpog, Marinduque (5), Poctoy Port ng Odiongan, Romblon (1) at Cuyo Port (1).

Sa Marinduque, pwede nang madaanan ang mga national highway na Torrijos-Buenavista at Torrijos Santa Cruz matapos pagtulungan linisin ng Municipal Disaster Risk Reduction and Management Office at ng Torrijos Engineering Department.

Inaalam pa ng OCD-Mimaropa kung madadaanan na ang mga spillway ng Anahawin at Villabeck sa Calintaan, Occidental Mindoro matapos mapaulat na binaha kaninang umaga.

PIA Mimaropa BROADCAST NEWS

LYNDON PLANTILLA, 0939-2974857 and 02-9203922

16 July 2014

Bilang ng mga naistranded na pasahero sa mga pantalan ng Mimaropa, nadagdagan

Umabot sa 504 ang bilang ng mga pasaherong naistranded sa mga pantalan sa Mimaropa.

Batay sa ulat ng Office of Civil Defense-Mimaropa  kaninang 10 ng gabi, mahigit sa 400 ang nasa Calapan Port sa Calapan City samantala ang natitira ay nasa  sa Abra de Ilog Port sa Occidental Mindoro, Dangay Port sa Roxas, Oriental Mindoro at Banalacan Port sa Mogpog Marinduque.

Una rito, nananawagan ang OCD-Mimaropa at iba pang mga miyembrong ahensiya ng Regional Disaster Risk Reduction and Management Council (RDRRMC) sa publiko na ipagpaliban muna ang kanilang mga lakad sa Mimaropa ngayong Martes at sa mga susunod na araw.

Matatandaang sinuspinde ng Calapan Port, Dangay Port, Abra de Ilog Port at iba pang pantalan ang kanilang mga operasyon bilang pag-iwas sa mga disgrasyang maidudulot ng pagdaan ng Bagyong Glenda sa  Mimaropa.

Tanging ang Puerto Princesa City Port sa Palawan ang normal ang operasyon.

Bukod sa mga pasahero, may 79 rolling cargoes at 6  na sea vessels ang naistranded din sa ilang mga pantalan.

Kaugnay nito, nagtutulungan ang OCD-Mimaropa, pamahalaang lungsod ng Calapan, Coast Guard District Southern Tagalog at Philippine Ports Authority para maalalayan ang mga pasahero. 

PIA-Mimaropa Broadcast News

Lyndon Plantilla, 09392974857 and 02-9203922

15 July 2014

Rescue Demonstration ng Mimaropa-RDRRMC sa Calapan City, ipinagpaliban

Ipinababatid ng Office of Civil Defense-Mimaropa na ipinagpaliban ang pagsasagawa ng Rescue Capability Demonstration Rehearsal at Actual Drill dahil sa inaasahang pagdaan ng Bagyong Glenda sa rehiyon.

Nakataas ang Public Storm Weather Signal No. 1 sa Oriental Mindoro, Occidental Mindoro at Romblon samantalang Signal Number 2 naman sa Marinduque.

Sa demonstrasyon na idaraos sana sa pagitan ng ika-16 at ika-`17 ngayong Hulyo, ipapakita sana ang mga aksyon na pwedeng gawin ng mga ahensiyang kabilang sa Mimaropa Disaster Risk Reduction and Management Council (Mimaropa-RDRRMC) kapag nagkaroon ng aberya ang isang barko, sunog sa pier at insidente ng terrorismo.

Pangungunahan ng Sandatahang Lakas, Philippine National Police at ng Coast Guard ang mga ehersisyong naka-takdang gawin sa demonstrasyon bilang bahagi ng mga aktibidad sa National Disaster Consciousness Month.

Samantala, ibinabalita pa lang ang pagdating ng Bagyong Glenda pero kumilos agad ang mga lokal na pamahalaan at iba pang mga ahensiyang nabibilang sa RDRRMC.

Naka-alerto ang mga provincial disaster risk reduction office at municipal office ng mga lokal na pamahalaan sa buong Mimaropa.

Ang regional field office ng Department of Social Welfare and Development ay maagang nagproseso ng mga karagdagang 20,000 family food pack para sa kanilang mga provincial Social Welfare and Development Team warehouse.

Nag-reposisyon din ang DSWD-Mimaropa ng mga food pack para sa mga liblib na barangay ng rehiyon.

Binabantayan naman ng Department of Public Works and Highways ang mga pambansang highways at mga tulay samantalang naka-white alert naman ang mga ospital ng Department of Health.

Kasama rin sa mga nagmamatyag sa kani-kanilang teritoryo ang mga sangay ng PNP.
Tumatakbo rin ang passenger assistance center ng Coast Guard District Southern Tagalog para sa mga naistranded na pasahero: katulong nila ang tanggapan ng Philippine Ports Authority sa pag-aasikaso sa mga pasahero sa Calapan Port.

Kasama sa naka-alert ngayon ang mga rescue units ng Coast Guard.
Nagbabantay din ang mga volunteers ng Philippine Red Cross partikular ang Mindoro Chapter at kasamang namamahagi ng impormasyon ang Kabalikat Civicom ng Marinduque.

PIA-Mimaropa Broadcast News
Lyndon Plantilla, 09392974857 at 02-9203924
15 July 2014

OCD, nananawagan sa mga bibiyahe sa Mimaropa na ipagpaliban muna ang lakad

Hinihikayat ng Office of Civil Defense-Mimaropa ang mga kumpanya ng bus na may byaheng -Calapan-Batangas at maging ang mga byahero mula sa Region 6 at iba pang lugar na papuntang Mimaropa na ikunsidera ang kanselasyon ng kanilang byahe ngayong araw na ito.

Kasama sa mga nag-suspinde ng operasyon ang Calapan Port bilang paghahanda sa pagdaan ng Bagyong Glenda.

Batay sa ulat ng ng OCD-Mimaropa kaninang alas-singko ng umaga, tanging ang Puerto Princesa City Port sa pitong pantalan ng Mimaropa ang nag-ooperate ngayon.

Nakikipag-ugnayan na rin ang OCD-Mimaropa sa Coast Guard District Southern Tagalog at sa Philippine Ports Authority o PPA para maalalayan ang may 298 na pasahero na naistranded sa Calapan Port.

 Kung isasama ang mga pasahero mula sa iba pang pantalan na nagsuspinde ng operasyon, aabot sa 375 ang bilang ng mga pasaherong naistranded.

Stranded din sa iba't ibang pantalan ang may 21 na rolling cargo at 13 sea vessels.

PIA-Mimaropa Broadcast News

Lyndon Plantilla, 09392974857 and 02-9203922

15 July 2014